Ich han nonie eh Ziitig so interessiert gläse we diä», schriebt de Manuel Walder uf Facebook.
Wie er händ sich tuusigi Schwiizer gfreut, e mal e Ziitig i dere Sprache z läse, wie ihne de Schnabel gwachse isch. Öb per Twitter, Facebook, Mail oder per Telefon – mir händ eus vor positive Reaktione chum chönne rettä. Danke villmal. E Uuswaal:
@carmen_mller: «De @blickamabend hani hüt hinderschi und vürschi gläse! Vo jedem Dialekt hets chli öpis!»
@AnonymusXtrazon: «Ich bi richtige Blick am Abig-Fan worde, die Aktion isch mal eis vo legendär und geil. Länger läse, schnelleri Zugfahrt, danke!»
@kasi_said: «Geile Scheiss hender da druckt.»
@domibrand: «Mis Highlight us de Mundart-Uusgaab: D Übersetzig vom Schilbär Gress :)»
@NatalieRickli: «Cooli Idee mit em Schwiizertüütsch! Het nie dänkt, dass es so aspruchsvoll isch, e ganzi Ziitig uf Mundart z läse!»
Erschöpfig bi de Schriiber und dä Läser
Da chömmer d Frau Rickli beruhige, au zum Schriibe ischs für eus en cheibe Chrampf xsi. Au anderi Läser sind nach de Lektüre erschöpft xsi:
@danikueng: «Eigentlich habe ich mich auf die heutige @blickamabend Ausgabe gefreut, aber meine Augen schmerzen nun!»
@gerryreinhardt: «Me muess sich so aastränge bim Läse. Das bin ich mich nüme gwöhnt.»
@martinfranziska: «Chaibe schwierig und sauglatt zum Läse!»
Natürli hät e Dialäkt- Uusgaab au anderi Vorteil:
@Michael_Manser: «Hüt hets kein einzige Schriibfähler! Komplimänt.»
@adrianmichel: «Wie eliminiert man Agenturmeldungen in Zeitungen? Durch eine Dialekt-Zeitung! Insofern ist der @blickamabend wirklich innovativ.»
Eusi Läser sind uf de Gschmack cho und fordered meh:
@dani_pfeffer_dp: «Uf schwiizertüütsch isch dä hammer. bitte ab jetzt ei mal pro wuche... oder?»
Sogar die Tüütsche sind druus cho
Öb mers jede Wuche schaffed, wüssed mer na nöd – aber spötischtens am sächste Geburi im Juni 2014 mached mers wieder.
Schliesslich händ sogar die Tüütsche Freud gha: «Ein riesen Kompliment an eure heutige Ausgabe. Ich stamme aus Bayern und hatte Spass im Zug auf der Heimfahrt», mailt eus d Daniela Blitz: «Allerdings muss ich sagen, dass der einzige Artikel, den ich nicht lesen konnte, der von eurem Kölner Kollegen war.»
Übrigens: Wer die die geschtrig Dialäkt-Nummere verpasst hät, cha sie da als ePaper naaläse.